AQSH federal sudi Davlat departamentiga DV-2027 green karta lotereyasini o'tkazishni buyurdi. Bu haqda Courthouse News Service xabar berdi.
14-oktabr kuni Kaliforniya Janubiy okrugi sudyasi Jinsuk Ota Red Eagle Law yuridik firmasining arizasini qanoatlantirdi. Firma davlat kotibi Marko Rubioga qarshi lotereya kechiktirilgani sababli sudga murojaat qilgan edi.
Sud qaroriga ko‘ra?
Davlat departamenti:
- 29-oktabrgacha ro'yxatga olish sanalari, ariza sayti va shartlarni e'lon qilishi;
- 1-noyabrdan kechiktirmay arizalarni qabul qilishni boshlashi;
- arizalarni 30 kun davomida qabul qilishi;
- g'oliblarni xabardor qilib, arizalarini odatiy tartibda ko'rib chiqishi kerak.
Vizalar 2027-yil 30-sentabrgacha yoki 55 000 ta viza tugaguncha beriladi.
Nega kechikdi?
Ro'yxatga olish 2025-yil kuzida bo'lishi kerak edi. 2025-yil 5-noyabrda Davlat departamenti ariza tartibini o'zgartirayotganini aytib, sanalarni keyinga qoldirdi.
2025-yil dekabrida dastur to'xtatildi. Sabab — Braun universitetidagi otishmada gumon qilingan shaxs AQShga aynan shu dastur orqali kirgani. Donald Tramp birinchi prezidentlik davridayoq lotereyaga qarshi chiqqan.
Lotereya haqida qisqacha
Diversity Visa dasturi AQShga kam immigrant keladigan davlatlar fuqarolariga har yili 55 000 tagacha viza ajratadi. Lotereyada yutish viza uchun ariza berish imkonini beradi, lekin avtomatik green karta degani emas.
Nimaga e'tibor berish kerak?
- Ariza faqat rasmiy dvprogram.state.gov saytida topshiriladi.
- Ro'yxatdan o'tish bepul.
- "Yutuqni kafolatlayman" deb pul so'raganlar — firibgarlar.
- Hukumat qarorni yuqori sudga shikoyat qilishi mumkin.
Aniq sanalar e'lon qilinishi bilan xabar beramiz. Buning uchun bizni ijtimoiy tarmoqlarda kuzatib boring.