Bolalikdan nogironligi bo‘lgan shaxslar, shuningdek I va II guruh nogironligi bo‘lgan shaxslarning har oylik daromadi mehnatga haq to‘lashning eng kam miqdorining 3 baravarigacha jismoniy shaxslardan olinadigan daromad solig‘idan ozod etiladi.
Imtiyoz pensiya guvohnomasi yoki tibbiy-ijtimoiy ekspert komissiyasining ma’lumotnomasi asosida qo‘llaniladi.
Urush nogironlari va qatnashchilari, shuningdek ularga tenglashtirilgan shaxslarning har oylik daromadi mehnatga haq to‘lashning eng kam miqdorining 1,41 baravarigacha soliq solishdan ozod qilinadi.
Mol-mulk solig‘i
Urush nogironlari va qatnashchilari, shuningdek qonunchilikda ularga tenglashtirilgan shaxslar mulkidagi mol-mulk soliqdan ozod qilinadi.
Imtiyoz mulkdor tanlagan bitta yashash uchun mo‘ljallangan ko‘chmas mulk ob’ektiga tatbiq etiladi.
I va II guruh nogironligi bo‘lgan shaxslar uchun avval mavjud bo‘lgan 60 kvadrat metr doirasidagi mol-mulk solig‘i imtiyozi 2025-yil 1 yanvardan bekor qilingan.
Er solig‘i
Quyidagilar jismoniy shaxslardan olinadigan er solig‘idan ozod qilinadi:
- urush nogironlari va qatnashchilari hamda ularga tenglashtirilgan shaxslar;
-I va II guruh nogironligi bo‘lgan shaxslar.
Imtiyoz pensiya guvohnomasi, tibbiy-ijtimoiy ekspert komissiyasining ma’lumotnomasi yoki imtiyozga bo‘lgan huquqni tasdiqlovchi boshqa tegishli hujjat asosida beriladi.
Er solig‘i bo‘yicha imtiyoz er uchastkasi huquq egasining tanloviga ko‘ra faqat bitta er uchastkasiga tatbiq etiladi.
Yakka tartibdagi tadbirkorlar uchun soliq
Avval I yoki II guruh nogironligi bo‘lgan yakka tartibdagi tadbirkorlar qat’iy belgilangan daromad solig‘ining 50 foizini to‘lashi haqida imtiyoz mavjud edi.
Biroq 2026-yil 1 yanvardan yakka tartibdagi tadbirkorlar uchun qat’iy belgilangan miqdordagi daromad solig‘ini to‘lash tartibi bekor qilingan.
Yillik aylanmasi 1 milliard so‘mgacha bo‘lgan yakka tartibdagi tadbirkorlar va o‘zini o‘zi band qilgan shaxslar aylanmadan olinadigan soliqni 1 foizlik stavkada to‘laydi.
Imtiyozdan foydalanish
Soliq imtiyozi avtomatik tarzda qo‘llanilmagan bo‘lsa, shaxs imtiyozga bo‘lgan huquqini tasdiqlovchi hujjatlarni tegishli soliq organiga taqdim etishi mumkin.
Mol-mulk yoki er uchastkasi bo‘yicha bir nechta ob’ekt mavjud bo‘lsa, imtiyoz qo‘llaniladigan ob’ekt soliq to‘lovchi tomonidan tanlanadi.