Ta’lim tashkilotida voyaga yetmagan bolaga jismoniy zo‘ravonlik qilgan yoki uni kamsitib, xo‘rlab tahqirlagan mas’ul shaxslarga bazaviy hisoblash miqdorining 1 baravaridan 5 baravarigacha jarima qo‘llanishi belgilandi.
Tegishli qo‘shimchalar 2026-yil 11-sentabrdagi O‘RQ–1174-son Qonun bilan kiritildi. Qonun 2026-yil 12-sentabrdan kuchga kirgan.
Qoida kimlarga tegishli?
Mazkur qoida ta’lim tashkilotida voyaga yetmagan bolalarga ta’lim va tarbiya berish majburiyati yuklatilgan shaxslarga tegishli. Shuning uchun uni faqat bog‘cha tarbiyachilariga taalluqli deb tushunish to‘g‘ri emas.
Javobgarlikka sabab bo‘ladigan harakatlar ta’lim-tarbiya jarayonida sodir etilgan bo‘lishi kerak. Bular:
- bolaga nisbatan jismoniy zo‘ravonlik qilish;
- uni kamsitish yoki xo‘rlash kabi harakatlar bilan tahqirlash.
Jarima qanday shartlarda qo‘llanadi?
BHMning 1–5 baravari miqdoridagi jarima harakatlarda jinoyat alomatlari hamda qonunda nazarda tutilgan boshqa huquqbuzarliklar alomatlari mavjud bo‘lmaganda qo‘llanadi.
Demak, bolaga nisbatan har qanday zo‘ravonlik faqat shu jarima bilan cheklanadi, degan xulosa noto‘g‘ri. Qilmishda jinoyat yoki boshqa huquqbuzarlik alomatlari bo‘lsa, unga tegishli huquqiy baho beriladi.
Bir yil pedagogik faoliyat bilan shug‘ullanish cheklanadi
Pedagogik faoliyat davomida voyaga yetmaganlarga nisbatan jismoniy va (yoki) ruhiy zo‘ravonlikka oid huquqbuzarlik sodir etgani uchun ma’muriy javobgarlikka tortilgan shaxslar bir yil davomida quyidagi tashkilotlarda pedagogik faoliyat bilan shug‘ullana olmaydi:
- maktabgacha ta’lim tashkilotlari;
- umumiy o‘rta va o‘rta maxsus ta’lim tashkilotlari;
- professional ta’lim tashkilotlari;
- bolalar uchun qo‘shimcha ta’lim tashkilotlari.
Ushbu cheklov zo‘ravonlik haqidagi shikoyatning o‘zigagina emas, tegishli huquqbuzarlik uchun ma’muriy javobgarlikka tortilganlikka bog‘langan.
Yangi tartib bolani nafaqat jismoniy zo‘ravonlikdan, balki uning sha’ni va qadr-qimmatini kamsituvchi muomaladan ham himoya qilishga qaratilgan.
MANBA:
